Mir Mehdi Majruh’s marsiya on Mirza Ghalib ‘s death

, Popular Blogs

KyoN na veeraan ho dayaar-e-suKHan

Mar gaya aaj taaj~daar-e-suKHan

Bulbul-e-KHush~taraana-e-m’ani

Gul-e-raNgeen-o-shaaKHsaar-e-suKHan

NaKH’l~baNd-e-hadeeqa-e-mazmooN

Taaz’gee~baKH’sh laala~zaar-e-suKhan

‘Arsa-e-nazm kyoN na ho veeraaN

Hai ‘inaaN~kash woh shah~sawaar-e-suKHan

KyoN na har’foN ka ho libaas siyaah

Hai GHam-e-marg-e-shahryaar-e-suKhan

Saath un ke gayee suKHan~saNjee

Un ka marqad hi hai mazaar-e-suKHan

Aab’yaari thi jis se woh na raha

Ab KHizaaN ho gayee bahaar-e-suKHan

NaGHma~pairaaiyaaN kahaaN waisi

Ab yeh hai naala~haaye~zaar-e-suKHan

Rashk-e-‘Urfi-o-faKHr-e-Taalib murd

Asadullah Khan Ghalib murd

Sheh’d goya bhara dahaan men tha

Kya maza aap ke bayaan men tha

Was’f is ja bayaaN se baahar hai

Lutf jo tab’e~nukta~daan men tha

HiNd men reh ke rashk-e-EeraaN ho

Was’f hazrat ki jo zabaan men tha

Hum to KHidmat men aap ki KHush the

CharKH par fikr imtehaan men tha

Sar pe saaya yuN’hi rahega sada

Dil-e-nadaaN isi dhyaan men tha

Qadr~aNdaaz charKH ne chhoRa

JaaN’sitaaN teer jo kamaan men tha

Wuhi gul~cheen-e-marg ne toRa

Phool yak’ta jo gul’sitaan men tha

Un ki roz-e-wafaat Dehli men

Yehi mazkoor dostaan men tha

Rashk-e-‘Urfi-o0-faKHr-e-Taalib murd

Asadullah Khan Ghalib murd

The Nizaami se naz’m men humsar

Fauq tha naz’r men Zahoori par

Us ka saani koi na us ka nazeer

Ek se ek hai GHaraz bihtar

Kaun taskeeN~fizaaye KHaatir ho

SaKHt bechain hai dil-e-muz’tar

Yaar karte haiN sab’r ki talqeen

Zulm hai jaan-e-naa~shikeba par

Aap ke paaNv to na chalte the

Tai yeh raah-e-daraaz ki kyoNkar

Aatish-e-GHam ki hai bhaRak waisi

Kaam aaye na apne deeda-e-tar

Ab to deedaar ko dikha deeje

Mere naaloN se hai bapa meh’shar

Kaun sunta hai ab kisi ki baat

Aaj kal to yeh shor hai ghar ghar

Rashk-e-‘Urfi-o-faKHr-e-Taalib murd

Asadullah Khan Ghalib murd

Ahl-e-Dehli ki thi buri taqdeer

Jo uTha yaaN se aisa baa~tauqeer

Aise phir saahib-e-kamaal kahaaN

Hai yeh fazl-o-hunar ka daur-e-aKHeer

Naz’m-e-Urdu se Tapki paRti hai

Wo jo hai tarz-e-KHaas-e-Hazrat-e-Meer

Aur Deewaan-e-Faarsi un ka

Falak-e-naz’m ka hai maah-e-muneer

Ghazal-e-Faarsi men hai jo sher

Hai Nazeeri ki fikr ka woh nazeer

Un ki doori men dekh le mujh ko

Jis ne dekhi na GHam ki ho tasveer

Iztiraab-e-mudaam bad hai magar

Dil pe qaaboo na ho to kya tadbeer

BaaGH-e-fazl-o-hunar ko KHaali dekh

Naala~zan yooN hai bulbul-e-dil’geer

Rashk-e-‘Urfi-o-faKHr-e-Taalib murd

Asadullah Khan Ghalib murd

Un ki shaf’qat jo yaad aati hai

Chashm daryaa-e-KHooN bahaati hai

Kal na thi jis jagah ke be jaaye

Wohi ja ab to kaaTe khaati hai

YooN to san’saan hai makaaN saara

Aah par shor-o-GHul machaati hai

Be~qaraari ka zor mat poochho

Sab’r ki dhajjiyaaN uRaati hai

Kaun aata hai behr-e-pursish-e-haal

HaaN GHashi GHam se aati jaati hai

Un ki doori men hai yeh bad~mazgi

Ke naheeN zeest apni bhaati hai

Yeh unheeN ka mazaar hai shaayad

YaaN se kuchh boo-e-ulfat aati hai

Kaan dhar kar jidhar se sunte haiN

Yeh nida aa ke GHam baRHaati hai

Rashk-e-‘Urfi-o-faKHr-e-Taalib murd

Asadullah Khan Ghalib murd

Ek jaaN aur laakh kaavish-e-GHam

Ek dil aur hazaar raNj-o-alam

Haan dar baRa ho chashm-e-toofaaN~rez

AaNsoo aane lage haiN kyoN tham’tham

Hai har ek shehr aur qariye men

Is ‘adeem-un-nazeer ka maatam

Roo-e-shaadi kabhi na dekheNge

Apne hirmaan-e-jaavidaaN ki qasam

Jis [e guzre wuhi yeh jaan’ta hai

GHam-e-hijraaN hai kis GHazab ka sitam

KaheeN is dard ka naheeN darmaaN

KaheeN is zaKH’m ka naheeN mar’ham

Bad hai doori agar’che ho dam bhar

Zehr hai zehr besh ho ya kam

Mujh se pursaaN hai is museebat ka

Tujh ko m’aaloom kya naheeN humdum

Rashk-e-‘Urfi-o-faKHr-e-Taalib murd

Asadullah Khan Ghalib murd

Jab’ke aaNkhoN se woh nihaaN ho jaaye

KyoN na dam seene men sinaaN ho jaaye

ChauNk uTheN KHwaab-e-marg se Hazrat

Is qadar shor ai fuGHaaN ho jaaye

Bulbul-e-baaGH-e-faz’l hai KHaamosh

Chup na kyoN murGH-e-subh~KHwaaN ho jaaye

Mehr-e-m’aani hai KHaak men pinhaaN

KyoN na taareek sab jahaaN ho jaaye

Josh men KHoon-e-dil hai haaN ai GHam

Rezish-e-chashm KHooN~fishaaN ho jaaye

Lab pe rehti hai aah-e-charKH~shikan

KaheeN TukRe na aasmaaN ho jaaye

Naala ho ya ke aah ya girya

Aaj in sab ka imtehaaN ho jaaye

YooN to chup baiThna naheeN achchha

Dil-e-pur~dard kuchh bayaaN ho jaaye

Rashk-e-‘Urfi-o-faKHr-e-Taalib murd

Asadullah Khan Ghalib murd

Kaun deta hai yaaN kisi ki daad

Tum kiye jaao naala-o-faryaad

Kya shareefoN ki qadr ho us ko

AasmaaN jab ke KHud ho sifla~nihaad

Us ko hai apni kaj~ravi se kaam

Koi barbaad ho ke ho ho aabaad

Koi ustaad-e-fan mare to mare

Hai yeh jaur-o-sitam men KHud ustaad

Inteqaal-e-Janaab-e-Ghalib ne

Kar diya KHaana-e-adab barbaad

Haaye jaNgal men us ki qabr bani

KaaKH-e-m’ani ki jo ke tha bun’yaad

Us ko KHizr-e-rah-e-suKHan samjho

Hai jo un ki zabaan ka irshaad

Poochha yeh saaniha jo yaaroN ne

Bola Majrooh baa~dil-e-naashaad

Rashk-e-‘Urfi-o-faKHr-e-Taalib murd

Asadullaha Khan Ghalib murd

Thi jo un ke mizaaj men tehzeeb

Woh jahaaN men naheeN kisi ko naseeb

Un se dekha kabhi na f’el-e-‘abas

Is se aagaah haiN ba’eed-o-qareeb

Sulh-e-kul ka rakha tha woh bartaao

The woh dushman ki bhi nazar men habeeb

Thi na ik baat lutf se KHaali

Yeh bhi ik baat thi ‘ajeeb-o-GHareeb

Guftugoo men ‘ajab fasaahat thi

Hote the mehv jis ko sun ke adeeb

Tha har ik baat ka naya aNdaaz

Har suKHan ki thi ik nayee tarkeeb

KHush hi jaata tha waaN se har GHamgeen

The magar aap KHush~dili ke tabeeb

Un ka taaboot dekh, baa~hasrat

Yehi kehta tha har ameer-o-GHareeb

Rashk-e-‘Urfi-o-faKHr-e-Taalib murd

Asadullah Khan Ghalib murd

In sa paida kahaaN ho, gar sau baar

Khaaye chakkar yeh charKH-e-kaj~raftaar

Thi yeh mazmoon ki durar~rezi

Silk-e-gauhar thi kilk-e-jaadoo~kaar

Un ki raNgeeni-e-‘ibaarat se

Saf’ha kaaGHaz ka hai bih~az~gulzaar

Is kalaam-e-baleeGH ko dekho

Lafz-aNdak men m’ani-e-bisyaar

Hilm tab’e saleem men woh tha

ChiooNTi tak ko na jis se tha aazaar

GHus’l dete haiN aao mushtaaqo

Dekho Hazrat ka aaKHiri deedaar

Gird taaboot tha hujoom-e-kaseer

Ahl-e-maatam men thi yehi guftaar

Jo ke jaate hum~rah-e-taaboot

Yehi kehte the woh pukaar pukaar

Rashk-e-‘Urfi-o-faKHr-e-Taalib murd

Asadullah Khan Ghalib murd

Leave a Reply

*